Խտրականությունը Հայաստանում․ խնդիրը լուրջ է համարում հարցվածների 70.4%-ը
«Հետազոտական ռեսուրսների կովկասյան կենտրոն-Հայաստան» (CRRC-Armenia) հիմնադրամը հրապարակել է Հայաստանում խտրականության վերաբերյալ առաջին համապարփակ համապետական հետազոտությունը։
Ուսումնասիրության արդյունքներով՝ հարցվածների 70.4%-ը խտրականությունը Հայաստանում համարում է լուրջ կամ որոշ չափով լուրջ խնդիր, իսկ 16.5%-ը հայտնել է, որ վերջին հինգ տարիների ընթացքում անձամբ բախվել է խտրականության առնվազն մեկ դեպքի։
Առավել ուշագրավ է մեկ այլ ցուցանիշ․ խտրականության անձնական փորձ ունեցածների 92.3%-ը վերջին դեպքի մասին որևէ տեղ չի հայտնել, իսկ համապատասխան պետական մարմինների է դիմել ընդամենը 1.7%-ը։
Հետազոտության շրջանակում 2025 թվականի նոյեմբեր-դեկտեմբերին հարցում է անցկացվել Հայաստանի ամբողջ տարածքում՝ 2200 չափահասների շրջանում, ինչպես նաև կազմակերպվել են խորքային հարցազրույցներ։
Ուսումնասիրությունն անդրադառնում է աշխատանքի, առողջապահության և կրթության ոլորտներում, ընտանիքում և համայնքներում, ինչպես նաև հանրային ու առցանց միջավայրերում խտրականության դրսևորումներին։ Առանձին ուսումնասիրվել են հասարակության տարբեր խմբերի նկատմամբ վերաբերմունքն ու կարծրատիպերը։
Հետազոտությունն իրականացրել է CRRC-Armenia-ն՝ Մարդու իրավունքների դանիական ինստիտուտի պատվերով և ՀՀ մարդու իրավունքների պաշտպանի գրասենյակի հետ համագործակցությամբ։
Ինչու է սա կարևոր
Թվերի միջև տարբերությունն ինքնին կարևոր հարց է առաջացնում։ Եթե մարդկանց 70.4%-ը խտրականությունը խնդիր է համարում, 16.5%-ը անձամբ բախվել է դրան, բայց այդ փորձառությունն ունեցողների ճնշող մեծամասնությունը որևէ տեղ չի դիմել, ապա խնդիրը միայն խտրականության առկայությունը չէ։ Հարց է նաև՝ քաղաքացին որքանով է վստահում կամ արդյունավետ համարում իր իրավունքների պաշտպանության գործող մեխանիզմները։
Աղբյուր՝ CRRC-Armenia, «Խտրականության ընկալումները Հայաստանում․ վերլուծական զեկույց»։