Ինչ է պետք անել հարցին պատասխանելու համար պետք է նախ հասկանանք ճգնաժամերի պատճառները: Ըստ իս դրանք են՝ անվստահություն, անելանելիություն այսօրվա խնդիրների առաջ, անորոշություն ապագայի նկատմամբ …
Հետևաբար ցանկացած ճգնաժամից դուրս գալու հիմնական ճանապարհները դա
- Վստահությունը, Հստակությունը և Կանխատեսելիությունն են:
Փորձեմ հիմնավորել… Ճգնաժամ առաջանում է,
- երբ չենք վստահում կառավարիչներին, անձերին, ովքեր պետք է լուծում առաջարկեն,
- երբ հստակ կամ հասկանալի չեն իրականացվող ծրագրերը, դրանց արդյունքում ակնկալվող արդյունքները,
- երբ չկան վստահելի և հստակ կանխատեսումներ հետագա գործընթացների և դրանց ժամկետների վերաբերյալ:
Հետևաբար այս խնդիրը ունի շատ պարզ լուծումներ
- Հնարավորինս շատ և լայն շրջանակների ընդգրկմամբ կազմակերպել քննարկումներ ըստ ոլորտների ու ճյուղերի: Որքան շատ մարդ ներգրավված լինի, անկախ քաղաքական հայացքներից, քննարկումներում և ծրագրերի մշակման գործընթացներում, այնքան բարձր կլինի դրանց նկատմամբ հասարակական վստահությունը:
- Ստեղծել համակարգ, որտեղ մարդիկ կգրանցեն իրենց խնդիրներն ու կարիքները: Խմբավորելով ու մշակելով դրանք, հնարավոր կլինի առավել հասցեական ու արդյունավետ ծրագրեր մշակել, որոնք կնպաստեն հստակությանը, հասկանալի կլինի մարդուն թե ինչով օգնեցին իրեն և որքանով է դա իր համար արդյունավետ:
- Նախորդ կետերի համադրմամբ մշակել և հրապարակային, ոլորտ առ ոլորտ, քննարկել ինչ վիճակ է տվյալ ոլորտում, ինչպիսի զարգացման սցենարներ կան և որի դեպքում ինչ քայլեր են նախատեսվում: Սա էլ կանխատեսելիությունը բարձրացնելու նպատակով, որը կօգնի մարդկանց կողմնորոշվել, պլանավորել իրենց հետագա գործունեությունը:
Արթուր Բալոյան
«Արդարություն» կուսակցության համանախագահ
